‘मानिसहरूका अगाडि बोल्नसमेत लजाउँथें,’ सरिना भन्छिन्— ‘मिस नेवा:को प्रशिक्षणमा सिकाइएका कुराले आज मलाई हरेक कुरामा अघि बढ्न सहयोग पुर्याएको छ । म कुनै पनि कुरा व्यक्त गर्न सक्षम भएकी छु ।’ सरिना अहिले नेप्लिज फेसन होम सोसल वेलफेयर विङको वेलफेयर एम्बेसडरका रूपमा कार्यरत छिन् ।सानैदेखि सामाजिक कार्यमा रुचि राख्ने सरिना वैशाख १२ गतेको भूकम्पपछि अधिकांश प्रभावित जिल्लाको भ्रमण गर्दै राहत वितरणमा सहभागी भइन् । सरिनाका अनुसार त्यसक्रममा उनले पीडितहरूको दु:ख नजिकबाट नियाल्ने अवसर प्राप्त गरिन् ।
नेपाल कलेज अफ म्यानेज्मेन्टमा बीबीए अन्तिम वर्षमा अध्ययरनत २२ वर्षीया सरिना ५ फिट ६ इन्च अग्ली छिन् । ‘मिस नेवा:’ अघि कुनै पनि सौन्दर्य प्रतियोगिता तथा फेसन शोमा सहभागिता नजनाएकी सरिना बीबीएको अध्ययनपछि मात्र ग्ल्यामरको क्षेत्रमा करियर बनाउने कि नबनाउने भन्ने टुंगोमा पुग्ने छिन् । चलचित्र तथा म्युजिक भिडियोबाट आएका केही प्रस्ताव पढाइकै कारण अस्वीकार गरिसकेकी सरिना यात्रा गर्न मन पराउँछिन् । फुर्सदमा उपन्यास पढ्न रुचाउने सरिनालाई आफ्नो व्यक्तित्वमा सबैभन्दा राम्रो लाग्ने पक्ष के होला ? सरिना भन्छिन्— ‘मानिसहरूले मेरो मुस्कान असाध्यै राम्रो छ भन्छन् तर मलाई आफ्ना आँखा राम्रा लाग्छन् ।’